«Заң және тәртіп» айлығы аясында оқушылармен өткізілген ақпараттық-профилактикалық әңгіме

«Заң және тәртіп» айлығы аясында мектепте 7-сынып оқушыларымен ақпараттық-профилактикалық әңгіме өткізілді. Кездесуді Сандықтау ауданы ПБ ЖПҚБ-ның учаскелік полиция инспекторы, полиция капитаны Айсин Максат Маратович жүргізді.

Әңгіме барысында инспектор кәмелетке толмағандардың әкімшілік және қылмыстық жауапкершілігі, жасөспірімдер арасында жиі кездесетін құқық бұзушылықтар, сондай-ақ заңға қайшы әрекеттердің салдары туралы жан-жақты түсіндірді. Буллинг, кибербуллинг мәселелеріне, жанжалдарға қатысқаны үшін жауапкершілікке, мектепте және мектептен тыс жерде мінез-құлық нормаларын сақтау қажеттілігіне ерекше назар аударылды.

Кездесу диалог форматында өтті: оқушылар өздерін қызықтырған сұрақтарын қойып, түрлі құқықтық жағдайлар бойынша түсініктемелер алды.

Кездесу соңында оқушыларға құқықтық бағыттағы ақпараттық жадынамалар таратылды. Осындай іс-шараларды өткізу жас ұрпақтың құқықтық мәдениетін, жауапкершілігін және заңға бағынатын мінез-құлқын қалыптастыруға ықпал етеді.